Alatsinain’ny Paka ao Antsirabe : Hiaka-tsehatra ny Randrampeo Fiderana
2026-03-27 - 04:53
Hiavaka ny alatsinain’ny Paka any Antsirabe. Hanatanteraka seho an-tsehatra any an-toerana, ny 6 avrily tontolo andro, ny Randrampeo Fiderana. Hatao ao amin’ny Kianja Maitso Spam Antsirabe izany. Hanomboka amin’ny 9 ora ny seho, araka ny nambaran’ireo mpikambana eo anivon’ny tarika sy ireo mpitandrina, tetsy amin’ny FJKM Isotry Fitiavana, omaly. « Hialohavan’ny fotoam-pivavahana izany. Hifandimby hiaka-tsehatra avy eo ary samy hanana 45mn avy ireo antoko mpihira eo anivon’ny Randrampeo », hoy izy ireo. Hiaka-tsehatra manomboka amin’ny 2 ora sy sasany kosa ny Randrampeo ka hitondra hira 20. Hisahana ny fanamafisam-peo ny Fami-Zik ao Antsirabe. Anisan’ny mampiavaka ny Randrampeo Fiderana ny maha tarika iray azy ireo rehefa nitambatra raha samy avy amin’ny antoko mpihira samihafa ny mpikambana. Anisan’ny mandrafitra izany ny avy amin’ny KT Ambatovinaky, Ny Kerobina Ankatso, ny Koraita Manarintsoa Finoana, ny Hosana Ambohijatovo Fitiavana, ny Ampifitia Isotry Fitiavana ary ny Trompetra Fanantenana 67Ha. Natao ho amin’ny fandraisam-peo ny hiran’ny tarika sy hanaovana rindran-tsary ary koa hanomanana ny tafika Masina sy ny « Grand festival evangélique 3 », any Toamasina, ny vola ho azo amin’izao seho izao. Hisy rahateo ny fivarotana CD sy DVD ary kojakoja samihafa avy amin’ireo antoko mpihira eo anivon’ny Randrampeo Fiderana amin’ny alatsinain’ny Paka io. Anisan’ny mpiara-miasa sy mpanohana izao hetsika izao ny antoko mpihira sy fikambanana avy amin’ny FLM sy ny FJKM ao Antsirabe. Synèse R.