Andron’ny 8 marsa – ivato : Vehivavy sahirana 400 nisitraka fanampiana
2026-03-09 - 04:36
Taorian’ny fitrotroana am-bavaka ny fanamarihana ny Andro iraisam-pirenena ho an’ny vehivavy, tetsy amin’ny kianjan’ny fanatanjahantena sy ny kolontsaina Mahamasina, tonga teny Ivato indray ireo vadin’ny mpanolotsaina avon’ny filohan’ny fanavaozana ny Repoblika sy ny lehiben’ny faritra Analamanga, Raharinirina Clémence, ny faran’ny herinandro teo. Tafiditra indrindra ao anatin’ny fanamarihana ny Andron’ny vehivavy hatrany ny hetsika izay nokarakarain’ny fikambanana Destiny, tarihin’ny vadin’ny ben’ny Tanàna eny an-toerana, Randrianarisoa Hoby. Nitondra fanampiana ho an’ireo vehivavy marefo ara-pivelomana sy ireo zokiolona ary ho an’ireo olona manana fahasembanana izy ireo tamin’izany. Samy nahazo vary sy kojakoja ilaina amin’ny fiainana andavanandro izy ireo. Nahatratra 400 ireo olona nisitraka ny fanomezana izay voafantina tamin’ireo fokontany 13 mandrafitra ny fokontanin’Ivato. Tafiditra ihany koa ao anatin’ny fankalazana sahady ny faha-10 taonan’ny fikambanana Destiny ny hetsika. Niantsehatra hatrany tao anatin’ny fitolomana ho an’ny zon’ny vehivavy sy ny fampivoarana ny fiainan’ny vehivavy ny fikambanana. Manome fiofanana ireo andriambavilanitra hananany fivelomana sy fizakan-tena ara-bola ihany koa ity fikambanana tarihin’ny vadin’ny ben’ny Tanànan’Ivato ity. Efa an’aliny ireo vehivavy nisitraka fanampiana sy fiofanana tao anatin’ny 10 taona nitsanganan’ny fikambanana. Manodidina ny 200 kosa ireo mpikambana izay mifanohana hatrany amin’ny firotsahana an-tsitrapo amin’ny asa fampivoarana ireo ankohonana sahirana ao Ivato. Hametraka ny vina ao anatin’ny 10 taona manaraka indray ny fikambanana miainga eto ary hanao ny ezaka hatrany ho an’ny sosialy sy ny fampivoarana ny vehivavy, hoy Randrianarisoa Hoby. Tatiana A