Banky Sipem-Materauto : Nitarina ny fiaraha-miasa
2026-03-14 - 05:56
Nanomboka tamin’ny fanamorana ny fividianana moto marika Loncin sy Voge ny fiaraha-miasan’ny banky Sipem sy ny orinasa Materauto, natao sonia ny 31 janoary 2025. Nohavaozina izany, ankehitriny, ka nitarina any amin’ny fividianana fiara, fiarabe, fitaovana vaventy,..., fitaovana mamokatra angovo avy amin’ny masoandro. Tanjona ny hanitarana ny fampandrosoana ara-toekarena eto Madagasikara. Nohamoraina ny fahafahan’ny mpanjifa mahazo ireo fitaovam-pitaterana amidin’ny Materauto. Notsorina ny fikarakarana ny antontan-taratasy, sady nohafainganina ny fivoahan’ny valiny. Nitarina hatrany amin’ny 60 volana ny fe-potoana hanonerana tsikelikely ny vidiny. Misy ny fiantohana ny mpanjifa mba hiarovana azy sy raha sanatria maty izy. Azo antonin’ny mpanjifa daholo ireo masoivohon’ny banky Sipem miisa 29 manerana ny Nosy, ankoatra ny an’ny Materauto. Nilaza ny tale jeneralin’ny banky Sipem, Benoît Sarraute, fa «ao anatin’ny paikady hanohananay ny mpandraharaha sy ny matihanina amin’ny fampiasam-bolany ity nanitarana ny fiaraha-miasa amin’ny Materauto ity». Nanamafy ny tale jeneralin’ny Materauto, Rémi Auge, fa « azo antoka fa vahaolana mahomby ny nanitarana ho karazana fiara sy fitaovana ho an’ny angovo. Tanjona ny hampaharitra ny seha-piharian’ireo mpandraharaha samihafa isan-tsokajiny ». Njaka A.