Basikety: Efatra herinandro ny fampivondronana
2026-01-28 - 05:53
Nanomboka ny alatsinainy 26 janoary lasa teo, haharitra hatramin’ny 20 febroary izao, ny fampivondronana ireo mpilalao eto an-toerana mandrafitra ny Ankoay. Hitiliana izay ho ekipa nasionaly hiatrika ny lalao fifanintsanana ho amin’ ny fiadiana ny amboara maneran-tany 2026, taranja basikety, izy ity. Raha ny fandaharam-potoana, fanomanana ara-batana sy “Technico tactique” no hiarahan’ireo mpilalao amin’ny mpanazatra mandritra ny 3 herinandro. Hiampy lalao izany amin’ny herinandro faran’ny fampivondronana. Aorian’izay, hihazo avy hatrany an’i Dakar ireo delegasionina ka hanao fampivondronana miaraka amin’ireo mpilalao avy ivelany. Nambaran’ny mpanazatra Ankoay, Rakotonanahary Ndranto, fa manana 6 andro eo hiarahana manao fanazarantena ireo mpilalao avy eto an-toerana sy ny avy ivelany, any Dakar. Efa miatrika fifaninanana ihany ireo mpilaravinahitra ireo ka efa azo lazaina ho ampy kotrana. Nanamafy ihany koa izy fa mpilalao efa zatra niaraka ireto nantsoina ireto, misy vitsivitsy kosa anefa ireo vaovao ka misy ny paikady efa napetraka hampahomby ny fahaiza-miaraka. « Tamin’ny fifaninanam-pirenena natrehan’izy ireo, ny taona 2025, no nitiliana ireto mpilalao miatrika fampivondronana ireto », hoy ny fanazavan’ny Tale teknika nasionaly eo anivon’ny Federasionina malagasin’ny basikety, Razafiarivony Solofohery Angelot. Miditra amin’ny andro fahatelo, anio, ny fampivondronana ary mizotra tsara izany, eny amin’ny Lapan’ny fanatanjahantena Mahamasina. Mi.Raz