Fampivelarana ny maha Malagasy: Tontosaina any Paris ny « Soratononina 2026 »
2026-03-28 - 04:43
23 taona aty aoriana... Mitohy hatrany ny fifaninanana « Soratononina » karakarain’ny fikambanana Kolo Malagasy. Ny lohahevitra no miovaova fa ny tanjona voatazona hatrany. Anio 28 marsa, ao amin’ny Institut national des langues et civilisations orientales Inalco – Paris 13e , no hanatanterahina ny «Soratononina 2026». Ahitana ny sokajy I, ho an’ireo efa mahay sy manoratra sy miteny malagasy sy ny sokajy II, ho an’ireo izay teraka tany Frantsa sy ivelan’i Madagasikara. Kopa-droa ny tanjona kendrena, raha ny fanazavan’i Jean Andrianaivo Ravelona, filohamboninahitry ny Kolo Malagasy, mikarakara ny «Soratononina». Eo ny hampitana ny fahalalana ara-kolontsaina, ara-javakanto sy soatoavina malagasy amin’ny alalan’ny soratononina. Ankoatra izay ny fampiroboroboana ny fahalalana, ny fifehezana, ny fanoratana, ny fandalinana ary ny fampitomboana ny fahalalana ny teny malagasy amin’ny alalan’ ny lahatsoratra. «Soratononina, fitaovana hampitana ny haren-tsarobidy ara-kolontsaina amam-panahy maha izy ny Malagasy», hoy izy. «Soratononina» iray na roa isan-taona no karakarain’ny fikambanana ao Paris sy any amin’ ny departemanta ao Frantsa. Miara-miasa amin’ny fikambanana ivelan’i Frantsa ny Kolo Malagasy. Miova isan-taona ny lohahevitry ny fifaninanana. Miainga amin’ny rantsana kolontsaina, zavakanto ary soatoavina malagasy. Anisan’izany ny fitafy malagasy, ny hosodoko malagasy, ny mozika malagasy, ny dihy malagasy, ny asa tanana malagasy, ny taotrano malagasy, ny fihavanana, ny harem-panahy, ny fahendrena ary ny fomba amam-panao. Natao ho fomba fiasan’ny Kolo Malagasy ny miainga amin’ny fandalinana sy fikarohana isaky ny rantsan-kolontsaina, zavakanto, soatoavina, safidiana ho lohahevitra. Hiarahana miasa amin’ny teknisiana na manam-pahaizana momba ilay lohahevitra hatao soratononina izany. Miroso amin’ny fanoratana ny mpanoratra avy eo. Aorian’izay, hifandrombonan’ ny mpampianatra teny malagasy ny fanitsiana sy fanatsarana ny lahatsoratra. Nanangona : HaRy Razafindrakoto