Festival Dôla Beach Vatomandry : Totorebika mandritra ny efatr’andro sy efatra alina
2026-03-25 - 04:34
Fetibe eny amin’ny torapasika mandritra ny hefarana. Ny 3 hatramin’ny 6 avrily izao no hanatontosana ny « Festival Dôla Beach » any Vatomandry. Totorebika andro aman’alina toy ny efa mahazatra, satria hiditra amin’ny andiany faha-14 izany amin’ izao. “Efa fotoana ifanomezana izy ity. Miezaka manatsara ny hetsika, mampiditra ireo izay andrasan’ny maro ary mitazona izay efa be mpankafy hatrany izahay”, hoy ny nambaran’ny filohan’ny komity mpikarakara, omaly, tetsy amin’ny Foiben’ny Yas Andraharo. Araka izany, hisy avokoa ireo karazana hetsika nampalaza ny “Dôla Beach” hatrizay. Ireo fifaninana ara-panatanjahantena maro, toy ny “rugby beach”, tolona, sns. Ireo fifaninanana ara-javakanto toy ny dihy basesa, ny “miss” sy “mister”, ary ireo fialamboly maro toy ny “belote”, sns. Mazava loatra ny fampisehoana goavana, izay hafanain-dry Lico Kininike, Dadi Love, Johnito, sns, amin’ity andiany ity. “Fihaonamben’ny mpianakavy, ary anisan’ireo mahavantana ny miala sasatra i Vatomandry, indrindra hatramin’ izay nisian’ny Dôla Beach. Antony niarahan’ny Yas tamin’ny hetsika izany”, hoy ny tomponandraikitr’ity orinasa ity. Zo ny Aina