Fiaraha-miasa : Hamaha ny olan’ny herinaratra ny Japoney
2026-03-05 - 04:47
Nambaran’ny minisitry ny Raharaham-bahiny, Razanamahasoa Christine, fa zava-dehibe ny lanonana fanaovan-tsonia fiaraha-miasa amin’ny fitondram-panjakana japoney, omaly, teo anivon’ny minisitera. Miompana amin’ny famatsiam-bola 68 miliara Ar izany. « Mitondra vahaolana amin’ny ampahany ny olana nitarainan’ny vahoaka izany. Anisan’izany ny olan’ny herinaratra ka anisan’ny hisitraka izany ny ao Toamasina », hoy izy. Notsiahiviny fa nataon’ ny filohan’ny Fanavaozana ny Repoblika, ny Kly Randrianirina Michaël sy ny governemanta ho laharam-pahamehana izany. Nankasitraka ny fanjakana japoney amin’ny alalan’ny masoivohon’ny Japon sy ny Jica ny tenany noho ny fanohanana ny fitondram-panjakana Fanavaozana sy ny filan’ny vahoaka. Hanatanteraka ny asa kosa ny minisiteran’ny Angovo sy ny akoranafo, miaraka amin’ny Jirama. Voatsiahy tamin’izany fa anisan’ny manana andraikitra manokana eo amin’ny fanatanterahana ny laharam-pahamehan’ny governemanta ny eo anivon’ny minisiteran’ny Raharaham-bahiny. Synèse R.