Hiragasy goavam-be : Samy sangany no nifanandrina
2026-01-26 - 09:11
Tarika Ramaroson Soanieranabe nifanandrina tamin’ny tarika RaEmilison Tsimakalagy avy any Arivonimamo. Nifandanja ny andaniny sy ny ankilany. Izay no nahitan’ireo mpijery ilay adin-kiragasy, tetsy amin’ny Kianja RaPetit Ampefiloha, omaly. Samy nitondra sy naneho ilay nahafantaran’ny olona azy hatramin’izay ny tarika tsirairay. Samy nahatazona ny fifantohan’ny mpijery ihany koa. Tarika RaEmilison, anisan’ny havanana amin’ny kabary. Tsy latsa-danja tamin’izany ny an’ny tarika Ramaroson avy any Soanieranabe. Niara-niaiky ny rehetra fa nahitana fivoarana tsara ny hiragasy. Afaka manaraka ny vanim-potoana ihany koa. Tsikaritra, omaly, ihany koa fa tsy mahasakana ny mpitia hiragasy ny fotoam-pahavaratra. Tolo-kevitra avy any amin-dry zareo ny : « tokony hampidirana maraindraina ny adin-kiragasy, amin’izay mba mirava alohan’ny hirotsahan’ny orana, ny tolakandro ». Teo ihany koa ny tokony hijeren’ny tomponandraikitra isan’ ambaratonga ny asa fandraharahana eo amin’ny tontolon’ny hiragasy. Raha ny tazana teny an-toerana. Anisan’ny mahavariana sy mahasondriana ny mpitia hiragasy ny fandrenesana tantara atao an-kira ao anatin’ity zavakanto iray ity. HaRy Razafindrakoto