Noho ny ady any Iran: Mety hisondrotra ny vidin-tsolika amin’ny avrily
2026-03-30 - 04:43
Miova isam-bolana ny vidin-tsolika eto amintsika, manaraka ny tsena iraisam-pirenena. Azo heverina fa tsy maintsy hisondro-bidy izany amin’ny volana avrily, noho ny fidangany vokatry ny ady mbola mitohy any Iran. Tafakatra 110 dolara ny vidin’ny iray barila (1b=159 litatra) amin’ny solika eo amin’ny tsena iraisam-pirenena « Brent », ny 26 marsa teo. Tsy mitsaha-miakatra io vidiny io, nanomboka tamin’ny fotoana nipoahan’ny ady, nanafihan’ny amerikanina sy israeliana an’Iran, ny 28 febroary teo, izay 70 dolara/b. Tena miantraika mivantana amin’ny vidin-tsolika eto amintsika io ady any Iran io satria manaraka ny vidiny eo amin’ny tsena iraisam-pirenena no ampiharina, nanomboka ny janoary 2025. Ovaina isam-bolana ny vidiny, ka tsy mahazo mihoatra na latsaky ny 200 Ar/litatra, araka ny fifanarahana natao tamin’ny Tahirimbola iraisam-pirenena. Izany hoe, azo heverina fa mety ho lasa 5 100 Ar ny litatry ny lasantsy SP95, raha 4 900 Ar/l izao. Ho 3 710/l ny gazoala raha 3510/l, ankehitriny ary ho 4 860 Ar/l ny solitany fandrehitra, raha 4 660 Ar/l izao. Tsotra ny antony, efa nipoaka ny ady tany Iran no nanainga tany Oman, firenena akaiky azy, ny sambo mpitatitra solika mankaty Madagasikara. Izany hoe, efa vidiny lafo no nividianana azy tany am-potony. Miova isaky ny faha-5 ny volana eo ho eo ny vidin-tsolika eto amintsika, izany hoe, tombanana hihatra ireo amin’ny 5 avrily ho avy izao. Tsy mihetsika ny sandan’ny dolara Vidiana amin’ny dolara ny solika afaran’i Madagasikara any ivelany. Anisan’ny miantraika any amin’ny vidin-tsolika ampiharina eto amintsika, araka izany, ny fiovaovan’ny sandam-bolantsika miohatra amin’ny dolara. Marindrano, tsy nihetsika firy anefa ny Ariary raha oharina amin’ny dolara, tamin’ity volana marsa ity. Nisanda 4 181 Ar ny dolara tamin’ny 27 febroary, iray andro mialoha ny nipoahan’ny ady any Iran. Tsy nifanalavitra amin’io, fa 4 167 Ar ny sandan’ny 1 dolara, ny 27 marsa teo. Midika izany fa mety hifanakaiky amin’ireo voalaza etsy ambony ireo ny vidiny hihatra eto Madagasikara amin’ity volana avrily ity. Njaka Andriantefiarinesy