Rakikira vaovao : Nafana ny famoahana ny « Za » Nate Tex
2026-02-09 - 04:58
Na, ho an’i Nate Tex, na ho an’ny mpijery sy mpankafy ny sanganasany. Andro lehibe ho azy ireo ny andro omaly, nivoahan’ny rakikira « Za » Nate Tex. Tao anatin’ny hafanana tanteraka ny seho. «Tena zava-dehibe loatra amiko ity. Mitantara fiainana be ilay rakikira...», hoy i Nate Tex nandritra ny fampahafantarana ny fivoahan’ilay rakikira « Za » Nate Tex, tany amin’ny volana janoary. Izay tokoa no nitranga nandritra ny fampisehoana an-tsehatra notontosainy tetsy amin’ny CCEsca Antanimena, omaly tolakandro. Seho nanehoana an-tsehatra ilay rakikira sy ny voarakitra ao anatiny. Tao anatin’ny hafanana tanteraka no nihirany sy nanolorany ny hira voarakitra tao anatin’ity rakikira faharoa ity. Nisongadina, omaly, ny fifampizarana fitiavana teo amin’ny mpijery sy ny teny an-tsehatra. Antony iray niteraka ilay hafanana ihany koa. Nolaroin’i Nate Tex hatsikana hatrany ny fanolorany ireo hira nohirainy sy ireo niarahany nihira tamina mpanakanto hafa. Tsikaritra fa havanana amin’ny fampitan-kevitra amin’ ny alalan’ny hatsikana ihany koa ity mpanakanto ity. Amin’ ny ankapobeny, ilay lalana nodiaviny nandritra ny taona maro no nentiny teny an-tsehatra. Anisan’ireny ny nanaovany fifaninanana « Pazzapa »... ...Niakatra hatrany ny hafanana sy ny fifamatorana teo amin’i Nate Tex sy ny mpijery tonga maro teny an-toerana... Nanamafy izany ny fiarahana mihira ny « Tsara tsodrano ». Tahaka izany ihany koa ny nahitana an’i Fy nihira niaraka taminy ilay hira « Mfly Away ». Fotoana nitondra hafanana lehibe tokoa nanerana ny efitrano. Fifampizarana hafanana sy fitiavana lehibe teo amin’i Nate Tex sy ny mpijery ihany koa ny fampiaraham-peo teo amin’ny sy i Micky niaraka tamin’ny zanak’izy ireo. HaRy Razafindrakoto