Sekolin’ny baolina kitra : Mandray ireo manam-pahaizana Portugais

2026-02-04 - 05:18

Ho avy eto Madagasikara, hizara fahaizana sy hampitombo traikefa ho an’ireo mpanazatra sy ny mpilalao, i Rui Fernandes sy i Guilherme Farinha, avy any Portugal. Hanomboka ny 12-21 febroary, etsy Betongolo sy Ambatolampy Tsimahafotsy, ny hetsika. Mikarakara hetsika fampiofanana mpanazatra sy mpilalao ny sekolin’ny baolina kitra Dream Team. Araka ny fanazavana nataon’izy ireo tetsy Antani­mena, oma­ly, hanomboka ny 12 hatramin’ ny 21 febroary izao ny hetsika. Hisahana izany ny teratany Portugais, Rui Fernandes, ma­nana ny diplaoma Uefa C, sy i Guilherme Farinha, efa mihazona ny mari-pahaizana Fifa A Pro. Tanjona ny hampivoatra sy hampiakatra ny lentan’ny mpanazatra sy mpilalao eto Madagasikara. Marihina fa etsy amin’ny Kianjan’i Beton­go­lo no hizara ny fahaiza-manaony izy ireo manomboka ny 12 febroary. Etsy amin’ny Complexe Sportif Ambatolam­py Tsimahafotsy kosa ho an’ ny ankizy ivelan’ny sekolin’ny baolina kitra Dream Team, ny 16 hatramin’ny 18 febroary. Natao ho an’ireo ankizy volavolaina ao amin’ny Dream Team kosa ny 19-21 febroary, eny Ambatolampy Tsimahafo­tsy ihany. Tsy voafetra ny fisoratana anarana amin’ity hetsika fampivoarana ny baolina kitra ity. Fifaninanana roa Ankoatra izay, handray anjara amin’ny fifaninanana iraisam-pirenana roa ny Dream Team. Voalohany, ny fifanintsanana Iber Cup, izay hatao any Portugal, ny 29 mey hatramin’ny 5 jona. Faharoa, ny Gothia Cup, hotontosaina any Suède, ny 12 hatramin’ny18 jolay. Efa nandray anjara tamin’ity fifaninanana farany ity ny sekoly tamin’ny taon-dasa. Tsiahivina fa niorina ny taona 2023 ny Dream Team. Mahatratra 90 ny mpilalao volavolain’ny mpanazatra miisa enina. Ankizy 7 hatramin’ny 18 taona no raisin’ny sekoly. Fitia Randria