Soavinandriana sy Itasy : Nahazo fitaovam-pandrefesana
2026-02-25 - 04:46
Notokanana tamin’ity herinandro ity ny fitaovam-pandrefesana ny singa mandrafitra ny toetry ny andro mahaleo tena ao Soavinandriana sy Itasy, napetraky ny Foibe famantarana ny toetry ny andro sy ny Cirad. Ao anatin’ny tetikasa « Démarches intégrées et accompagnement pour une agriculture familiale à Madagascar innovante et résiliente aux changements climatiques (Dinaamicc) », vatsian’ny Vondrona eoropeanina vola, izany. Mandrefy tsy tapaka ny maripana, ny hamandoana, ny rotsakorana, ny tsindry atmosferika ary ny fitsoka sy ny hafainganam-pandeha ary ny lalan’ny rivotra ny tobim-pamantarana. Hanatsara ny vinavinan’ny toetr’andro sy hanamafy ny fampitandremana mialoha, ho fiarovana ny vahoaka sy ny tantsaha ny angon-drakitra azo avy aminy ka halefa mivantana any amin’ ny Foibe famantarana ny toetry ny andro. Hanamafy ny fahaiza-manao ara-tsiansa eo amin’ny sehatry ny toetr’andro sy ny fiovaovany ihany koa ireo fitaovana ireo. Toby synoptika mandrefy tsy tapaka ny maripana, tsindry rivotra, hamandoana, hafainganam-pandeha sy làlan’ ny rivotra ary rotsakorana ny ao Soavinandriana. Toby hydrometeorolojika kosa ny ao Ampefy hanaraha-maso ny farihin’ Itasy sy ny renirano manodidina. Mandrefy ny haavon’ny rano sy ny fiovany hisorohana ny tondradrano, hitantanana tsara ny loharano ary hiarovana ny asa fambolena sy ny jono. Fitaovana tena ilaina hanamafisana ny fahaiza-miatrika ny fiovaovan’ny toetr’andro ireo fotodrafitrasa ireo. Satria faritra miankina amin’ny fambolena sy ny harena an-drano i Itasy. Vonjy